|
HOME
|
|
|
|
MUNICIPALITY |
|
|
RESIDENTS
|
|
|
BUSINESS |
|
|
VISITORS |
|
|
2010 |
|
|
|
|
|
|
|
|
Handover of completed houses to beneficiaries
Keynote Address by Executive Mayor
Cllr. Zintle Peter
Mandibulise kuwe Programme Director, ndibulise ku-Ward Councillor walapha u-Councillor Mimkulu Mabeta; ndibulise kuze zonke ii-Councillors neenkokheli zopolitiko ezikhoyo apha namhlanje; ndibulise kumagosa aseburhulumenteni akhoyo apha ngokunjalo namagosa kaMasipala we-Buffalo City; ndibulise kwiindwendwe zethu ezibalulekileyo; ndibulise nakubahlali jikelele.
Yimini eyodwa le yanamhlanje, imini athi ngayo uMasipala we-Buffalo City azalisekise izithembiso zakhe kumaxhoba ezikhukhula ezahlasela iDankeni ngo-Agasti ka-2002.
Yimini esithi ngayo kwezo ntsizana ezazibona sele zilala emaholweni, "asinilibelanga."
Kwangayo le mini, sivuyisana nabahlali balapha eReeston abasele bengenile nabo kwizindlu zabo ababezithenjisiwe.
Ewe kambe ndiyayiqonda intlungu yokulinda ithuba elide, ngokokude ungenwe ngamathandabuzo ngobunyani besi sithembiso usinikiweyo.
Namhlanje ke ndithi mandibulele kuni bahlali ngokuthi nisinyamezele. Loo nto ibonisa ukusithemba nokubambelela kwenu kumadinga esawenza nani.
Enye into ebangele ukuba eli phulo lokwakhiwa kwezi indlu lihambe ngonyawo lonwabu kukunqongophala kwemali yokwakha, njengoko izikhukhula zika-2002 zasifikela ngequbuliso, kungekho mali ibekwe bucala ukwakha ezi zindlu sizakhayo ngoku.
And today I feel I must express a word of gratitude to the Department of Housing kweli phondo lethu lalapha eMpuma-Koloni. Without their sympathy and understanding, without their much-needed support and financial injection, mhlawumbi abantu abaninzi ngebesahleli emaholweni.
Zizonke zizindlu eziyi-4,500 eziza kwakhiwa apha e-Reeston phantsi kweli phulo lika-Phase 3. Ezinye zazo zilungiselelwe abantu balapha e-Reeston abakwi-waiting list kakade, ukuze inxenye inikezelwe kubantu abafuduswe besuswa eDankeni.
Isigaba sokuqala seli phulo sibandakanya izindlu eziyi-796, at a total cost in excess of R32 million. Eziyi-653 sele zigqityiwe ukwakhiwa, kanti ezishiyekileyo kulindeleke ukuba zigqitywe ngo-June kwakulo nyaka zikuwo.
Isigaba sesibini siza kubonelela ngezindlu eziyi-3,700, nekulindeleke ukuba loo msebenzi uqaliswe ngo-May lo siya kuye. IIndleko zawo uwonke loo msebenzi zifikelela kwi-R142 million.
Ngethuba bendilapha e-Reeston kwiphulo lam leembizo ngo-October wonyaka ophelileyo, uninzi lwezicelo zenu ibe zezokuba makukhawuleziswe ukwakhiwa kwezi zindlu njengoko iintsapho ezininzi zihleli ebugxwayibeni.
I promised you that I would take personal responsibility to ensure that building progress is accelerated ukuzama ukukhawulelanana naloo ntlungu naniyivakalisa.
NgoDisemba ndixelelwe ukuba kukho izindlu esele zigqityiwe ukwakhiwa kwaye zikulungele ukuhlaliwa. Ndithe kuba ndingafuni ukunilibazisa, ndanika umyalelo othi manikhululelwe ningene kwezo zindlu, ningalindi mna ukuba ndize kuninika izitshixo ngokusesikweni.
Ndithetha nje ziintsapho eziyi-310 ezisuka e-Dankeni esele zihlala kwizindlu zazo ezintsha apha e-Reeston. Kukho nezinye iintsapho eziyi-2,500 ekusalindeleke ukuba zifuduswe eDankeni zize kuhlaliswa apha e-Reeston. Zona ke ziza kubonelelwa kwizindlu eziza kwakhiwa kwisigaba sesibini seli phulo lika-Phase 3.
Onke ke la malinge siwenzayo sizama ukuqinisekisa ukuba zonke iintsapho ezilapha e-Buffalo City zinamakhaya angawazo asemgangathweni, kungabikho bantu bahleli ebugxwayibeni betshiswa ngamalanga, betyiwa naziingqele zobusika.
Sizama ukubuyisa isidima sabantu bethu abaphulukana naso phantsi kolawulo lorhulumente wengcinezelo wamandulo.
Xa ndigqibezela ke bahlali, ndithi mandisenze isicelo kuni sokuba nisebenzisane nathi ukuqinisekisa ukuba izindlu zifunyanwa ngabantu abanelungelo lazo; abantu abadingayo; abantu abahluphekayo.
Andonwabi nje kwaphela xa ndifumana iingxelo zabantu abafumana izindlu kuMasipala baphinde baziqeshisele abanye abantu, kuba bona benezindlu eziphucukileyo kwezinye iindawo.
Omnye umkhwa ondiphatha kakubi ngowabantu abathi bakufumana izindlu baphinde banikezele ngazo kwabanye, bona baphindele kula matyotyombe sibakhuphe kuwo.
Baziwa nini ke abantu abanjalo. Nezindlu ezi bafeketha ngazo zezenu. Nini ngoko abanamandla okuwulwa nokuwuphelisa loo mkhwa. Zixeleni ezo zinto kwi-Ward Councillor yenu, ukuze yona iwuqgithisele loo mcimbi kuaMasipala.
Ngoku ke mandicele umama u-Luleka Faniso ukuba eze ngaphambili, aze kwamkela isitshixo sendlu yakhe, athi ngokwenjenjalo abe wamkela izitshixo egameni labo bonke abantu abasele behlala kwizindlu zabo, kunye nabo basaza kungena kwizindlu zabo ezingekagqitywa.
Ndiyabulela.
|
|
|
|
|
|
Contact us: